ጎረቤትህን መንገድ ላይ ስታየው ሰላምታ ሰጠኸው። ይህ ጎረቤትህ ከቅርብ ጊዜ ወዲህ አንተንም ሆነ የቤተሰብህን አባላት ልብ ብሎ እንደሚመለከታችሁ አስተውለሃል። እሱም ለሰላምታህ ምላሽ ከሰጠ በኋላ ሊያነጋግርህ እንደሚፈልግ በምልክት ጠቆመህ። ከዚያም “አንድ ነገር ልጠይቅህ ፈልጌ ነበር፦ ከሌሎች ሰዎች የተለያችሁ የሆናችሁት ለምንድን ነው?” አለህ። አንተም “ጥያቄህ አልገባኝም” አልከው። ጎረቤትህ እንዲህ በማለት መለሰልህ፦ “የይሖዋ ምሥክሮች ናችሁ አይደል? እንደ ሌላው ሰው አይደላችሁም። ከሌሎች ሃይማኖቶች በጣም የተለያችሁ ናችሁ፤ ለምሳሌ በዓላትን አታከብሩም እንዲሁም በፖለቲካም ሆነ በጦርነት አትካፈሉም። ሲጋራ አታጨሱም። የቤተሰብህ አባላትም ጥሩ ሥነ ምግባር አላቸው። ይህን ያህል የተለያችሁ እንድትሆኑ ያደረጋችሁ ምንድን ነው?”

ከሌሎች የተለየን የሆንነው የአምላክ መንግሥት ተገዢዎች በመሆናችን እንደሆነ ታውቃለህ። ንጉሣችን ኢየሱስ እኛን ለማጥራት ሁልጊዜ እርምጃ ይወስዳል። የእሱን ፈለግ እንድንከተልና ከዚህ ክፉ ዓለም የተለየን እንድንሆን እየረዳን ነው። መሲሐዊው መንግሥት፣ ከመንፈሳዊ ነገሮችና ከሥነ ምግባር ጋር በተያያዘ እንዲሁም በድርጅታዊ አሠራር ረገድ የአምላክን ሕዝቦች ሲያጠራቸው የቆየው እንዴት እንደሆነ በዚህ ክፍል ውስጥ እንመለከታለን።