3 JALJA
Diosan Reinopan mayitanakapa: Diosatakjam sarnaqañatakiw chʼamachasipjje
VECINOMAJJA, kunsa familiamamp lurasipkta uk wal uñchʼukinipjjtamjja. Mä urojja, jupar uñjasaw arunttajja, vecinomajj aruntaraktamwa ukat ‘jutam’ sasaw jawstamjja. Ukat akham sistamwa: “May jisktʼañ munsma, ¿kunatsa jumanakajj jan mayninakjamäpkta?” sasa. “¿Kunatsa ukham sista?” sasaw jumajj sarakta. Vecinomajj akham saskakiwa: “¿Jehová Diosan Qhanañchirinakapjam uñtʼatäpjjtajjaya? Jumanakajj janiw mayni religionanakar sarapki uka jaqenakjamäpktati. Janiw fiestanak amtapktati ukat janirakiw politicarus ni chʼajjwäwinakarus mitisipktati. Janiw jumanakat maynis cigarro fumkiti. Ukat sum sarnaqañatakiw chʼamachasipjjarakta. ¿Kunatsa taqe ukanakan mayjäpjjta?” sasa.
Cheqansa, Jehová Diosan Reinopampi apnaqatäpjjtanwa. Jesusaw jupat yateqasiñasataki ukat qʼom sarnaqañasatakejj yanaptʼistu. Ukatwa aka ñanqha pachan jakapki uka jaqenakat mayjätanjja. Jesucristo Reyejj kunjamsa Jehová Diosar jachʼañchapjjañapatak ajay toqensa, sarnaqañ toqensa arkirinakapar qʼomachawayi ukat Diosan markap sum sarayapjjañapatakis yanaptʼawayi, ukwa aka jaljan yatjjataskañäni.
AKA SECCIONANJJA AKA YATICHÄWINAKAW UTJI
10 YATICHÄWI
Reyejj arkirinakaparuw qʼomachi
¿Cruz apnaqañampi ukat Navidad amtañampejj kunansa niya kikpäpjje?
11 YATICHÄWI
Sarnaqañ toqetwa cristianonakar qʼomachasi: Qollan Diosatakjam sarnaqaña
Ezequiel profetajj mä visionan templor mantañatak punkunaka ukat guardianakan utanakap uñjkäna ukanakajj kamsañsa muni, uk amuytʼañaw Diosan markaparojj 1914 marat aksarojj wal yanaptʼawayi.
12 YATICHÄWI
‘Sumankañ utjayir Diosar’ sum servipjjañapatakiw yanaptʼasi
Bibliajj janiw ‘jan yäpar apnaqañata’ ukat sum apnaqañat parlkiti, jan ukasti, ‘jan yäpar apnaqañata’ ukat sumankañatwa parli, ¿kunatsa? ¿Kunjamsa uk yatiñajj cristianonakar yanaptʼi?
