HƏR DƏFƏ qonşunun evinin yanından keçəndə başınızı yelləyərək ona salam verirsiniz. Sonra diqqət yetirirsiniz ki, o, sizi və ailənizi kənardan müşahidə edir. Və bir gün o başı ilə işarə edir ki, ona yaxınlaşasınız. O deyir: «Sizə bir sual verə bilərəm: başqalarından bu qədər fərqlənməyinizin səbəbi nədir?» «Hansı mənada?» — deyə siz maraqlanırsınız. Cavabında o deyir: «Siz Yehovanın Şahidisiniz, elə deyil? Başqalarına heç bənzəmirsiniz. Digər dinlərdən tamamilə fərqlənirsiniz — nə bayramları qeyd edirsiniz, nə də siyasətdə və müharibələrdə iştirak edirsiniz. Sizlərdən heç kim siqaret çəkmir. Və görürəm ki, ailəniz çox mərifətli-qanacaqlı ailədir. Nəyin sayəsində başqalarından bu qədər fərqlənirsiniz?»

Səbəb sadədir: biz Allahın Padşahlığının rəhbərliyi altında yaşayırıq. Padşahımız İsa bizi daim saflaşdırır. O, bizə onun izləri ilə gedərək bu natəmiz dünyaya qaynayıb-qarışmamağa kömək edir. Bu bölmədən Məsihin idarə etdiyi Padşahlığın Yehovanın izzəti üçün Onun xalqını ruhani, əxlaqi və təşkilati cəhətdən necə saflaşdırdığını öyrənəcəyik.