MANTANG naglalakaw ka, pinaypay mo an kataid nindo. Kan nakaaging mga aldaw, nariparo mo na pig-oobserbaran ka niya asin an pamilya mo. Pinaypay ka man niya para rumani sa saiya. Nagsabi siya: “May ihahapot lang ako saimo. Taano ta ibang-iba kamo?” “Ano an buot mong sabihon?” an hapot mo. Nagsimbag siya: “Mga Saksi ni Jehova kamo, bako? Bako kamong arog nin iba. Bako kamong kapareho nin ibang relihiyon—dai kamo nagseselebrar nin mga holiday, saka dai kamo nakikilabot sa pulitika asin giyera. Dai nin nagsisigarilyo saindo. Saka garo halangkaw an pamantayan sa moral kan pamilya mo. Taano ta ibang-iba nanggad kamo?”

Aram mong an simbag iyo sana ini: Namumuhay kita na sakop kan pamamahala kan Kahadian nin Diyos. Padagos kitang dinadalisay ni Jesus bilang Hadi. Tinatabangan niya kita na sumunod sa mga lakad niya asin sa siring magin napapalain nanggad sa maraot na kinaban na ini. Mahihiling ta sa seksiyon na ini kun paano dinadalisay kan Mesiyanikong Kahadian an mga lingkod nin Diyos sa espirituwal, moral, asin organisasyonal na paagi—an gabos sa ikakamuraway ni Jehova.