EPUNI a pane hale kowe la atre lapa ezi epun. Nge epuni hi a öhne la angeic a goeëne huti epuni me hnepe lapa i epun. Angeice a hë epuni jë. Öni angeic: “Hetre hnyingenge koi nyipë? Hnauëne laka tha ceitui epuni kö memine la itre xa atr?” Öni epuni jë hi: “Ke pine nemen?” Öni angeic, “Ame epuni lo, tre Itretre Anyipici Iehova? Tha ceitu i epuni kö me itre xan. Tha epuni fe kö a hane tune la itre xa hmi, itre ka feetëne lo itre drai hna atrun, me kuci politik, me lö hnine la itre isi. Pëkö ka hane ufi sixa thei epun. Nge lolo catre la thiina ne la hnepe lapa i epun. Hnauëne laka ame ngöne la itre götrane ka nyimutre ne la mel, tre isapengöi epuni catre me itre xan?”

Tha jole kö e troa trotrohnin: Easa mele fene la musi ne la Baselaia. Iesu Joxu a nyidrawa së. Nyidrëti a xatua së troa trongëne la itre thupa ca i nyidrë, matre ketre mama kö së ngöne la fene celë ka ngazo. Ame ngöne la xötre mekene celë, tro sa ce wange la aqane nyidrawane la itre hlue i Akötresie ngöne la götrane u, me thiina, me aqane eköthe trongëne la organizasio göi troa atrunyi Iehova.