MIIRI k’a filɛ, i tɛmɛtɔ i sigiɲɔgɔn dɔ gɛrɛfɛ, i b’i bolo wuli k’a fo. I y’a kɔrɔsi ko kɔsa nin na, a be e n’i ka denbayamɔgɔw kɔrɔsira. A fana b’i fo ani a be baro daminɛ n’i ye k’a fɔ ko: “Hakɛ to, n’ b’a fɛ k’i ɲininga koo dɔ la. Mun lo y’a to aw be dan na mɔgɔ tɔɔw la do?” I b’a jaabi ko: “I b’a fɛ ka mun lo fɔ?” A b’a fɔ i ye ko: “Ne ko aw ye Jehova Seerew lo ye kɛ? Aw ni mɔgɔ tɔɔw tɛ kelen ye. Aw t’aw seen don diinan wɛrɛ ka koow la, aw tɛ fɛtiw kɛ, ani aw seen tɛ politikikow ni kɛlɛkow la. Aw cɛma, mɔgɔ si tɛ sigarɛti min, ani i ka denbayamɔgɔw tagamacogo ka ɲi yɛrɛ le. Mun lo y’a to aw be dan na mɔgɔ tɔɔw la koo caaman na?”

E b’a lɔn k’o jaabi ka nɔgɔ: an b’a to Ala ka Masaya lo k’an ɲɛminɛ. An ka Masacɛ Yezu b’a la k’an jogow fisaya. A b’an dɛmɛna k’a sennɔ ta ani ka danfara don an ni duniɲa juguman nin cɛ. Tilanyɔrɔ nin na, an ben’a ye cogo min na Masiya ka Masaya b’a la ka Ala sagokɛlaw cogo fisaya Alako ta fan fɛ, tagamacogo ani labɛnko ɲuman ta fan fɛ walisa nɔɔrɔ ka la Jehova kan.