FÃ 3
Maŋtsɛyeli lɛ Shishitoo Mlai—Nyɔŋmɔ Jalɛ lɛ Sɛɛgbɛ Taomɔ
OONYIƐ, kɛkɛ ni ofɔ̃ okutsoŋnyo ko nine. Bei nɛɛ amli lɛ, oyɔse akɛ efɔɔ bo kɛ oweku lɛ kwɛmɔ waa. Lɛ hu efɔ̃ bo nine kɛkɛ ni etsɛ oyisɛɛ. Ebi akɛ: “Ani manyɛ mabi bo sane ko? Mɛni hãa esoroɔ nyɛ kwraa nakai?” Kɛkɛ ni obi lɛ akɛ: “Te otsɔɔ tɛŋŋ?” Eto he akɛ, “Bɛ Yehowa Odasefonyo ji bo, aloo miimale? Esoro nyɛ kwraa yɛ mɛi krokomɛi ahe. Nyɛtamɔɔɔ jamɔi krokomɛi lɛ—nyɛyeee gbii juji, ni nyɛkɛ nyɛhe wooo maŋkwramɔ saji kɛ tai amli. Nyɛshɛreee zigaret kɛ ehenɔi lɛ. Kɛfata he lɛ, etamɔ nɔ ni nyɛweku lɛ baa amɛjeŋ jogbaŋŋ diɛŋtsɛ. Mɛni hãa esoroɔ nyɛ kwraa yɛ nibii amli nakai lɛ?”
Ole jogbaŋŋ akɛ nɔ kome pɛ hãa ebaa lɛ nakai: Nyɔŋmɔ Maŋtsɛyeli nɔyeli lɛ shishi wɔyɔɔ lɛ. Ákɛ Maŋtsɛ lɛ, Yesu kã he eetsuu wɔhe. Eeye eebua wɔ koni wɔnyiɛ enanemaahei lɛ asɛɛ, koni ana wɔ akɛ mɛi srɔto yɛ jeŋ fɔŋ nɛɛ mli. Yɛ fã nɛɛ mli lɛ, wɔbaana bɔ ni Mesia Maŋtsɛyeli lɛ tsuɔ Nyɔŋmɔ webii lɛ ahe yɛ mumɔŋ, jeŋba mli, kɛ bɔ ni etsuɔ asafo lɛ hu he—ni efeɔ enɛ fɛɛ kɛwoɔ Yehowa hiɛ nyam.
YƐ FÃ NƐƐ MLI
YITSO 11
Jeŋba Tsakemɔi ni kɛ Nyɔŋmɔ Krɔŋŋfeemɔ Kpãa Gbee
Bulɔi atsũi kɛ agbói ni yɔɔ Ezekiel sɔlemɔwe lɛ he ninaa lɛ mli lɛ hiɛ shishinumɔ krɛdɛɛ ko kɛhã Nyɔŋmɔ webii lɛ kɛjɛ afi 1914 tɔ̃ɔ.
YITSO 12
Ato Wɔhe Gbɛjianɔ Koni Wɔsɔmɔ ‘Toiŋjɔlɛ Nyɔŋmɔ Lɛ’
Biblia lɛ kɛ sakasakafeemɔ etooo gbɛjianɔ ni atoɔ jogbaŋŋ he, moŋ lɛ ekɛto toiŋjɔlɛ he. Mɛni hewɔ? Te hetoo lɛ saa Kristofoi ahe ehãa tɛŋŋ ŋmɛnɛ?