ADÀ 3
Nujinọtedo Ahọluduta lọ Tọn lẹ—Dindin Dodowiwa Jiwheyẹwhe Tọn
DILE a zinzọnlin wá jei, a ze alọ na kọmẹnu towe. To agọe, a doayi e go dọ e to ayido hiẹ po whẹndo towe po go. Ewọ lọsu ze alọ na we bo mìalọ na we nado wá. Enẹgodo e kanse we dọ: “N’gán kàn kanbiọ de sè we ya? Etẹwutu mìwlẹ do gbọnvo sọmọ?” A kanse e dọ, “Etẹ na dọ a te?” Ewọ sọ dọmọ: “Kunnudetọ Jehovah tọn de wẹ mì yin, kavi? Mìwlẹ gbọnvona mẹhe pò lẹ. Nuwiwa mìtọn nọ gbọnvona sinsẹ̀n he pò lẹ tọn—mì ma nọ dùwhe, mì ma nọ donù tonudidọ mẹ bo ma nọ doalọ to awhàn mẹ. Mẹde ma nọ nù azọ̀ to mì mẹ. Podọ whẹndo towe sọ tindo nujinọtedo he yiaga lẹ. Etẹwẹ zọ́n bọ mì do gbọnvo to aliho lẹpo mẹ sọmọ?”
A yọnẹn dọ gblọndo lọ poun wẹ yindọ: Mí to gbẹnọ to gandudu Ahọluduta Jiwheyẹwhe tọn glọ. Taidi Ahọlu mítọn, Jesu to mí klọ́we to whepoponu. E nọ to alọgọna mí nado to zọnlinzin gbọn afọdòmẹ etọn lẹ ji bo gbọnmọ dali gbọnvona aihọn ylankan ehe. To adà ehe mẹ, mí na mọ lehe Ahọluduta Mẹsia tọn ko to omẹ Jiwheyẹwhe tọn lẹ klọ́we to gbigbọ-liho, walọyizan-liho po titobasinanu-liho po do—popolẹpo nado hẹn gigo wá na Jehovah.
TO ADÀ EHE MẸ
WETA 11
Vọjlado lẹ to Walọyizan-Liho—He Do Wiwe-Yinyin Jiwheyẹwhe Tọn Hia
Abò nuhọ́tọ tọn lẹ po họntonu tẹmpli gbigbọmẹ tọn he Ezekiẹli mọ to numimọ mẹ lọ lẹ tọn po tindo zẹẹmẹ vonọtaun na omẹ Jiwheyẹwhe tọn lẹ sọn 1914.
WETA 12
Mí Yin Tito-Basina Nado Sẹ̀n “Jiwheyẹwhe Jijọho Tọn”
Biblu ma do vogbingbọn he to bẹwlu po titojininọ po mẹ hia gba, ṣigba to bẹwlu po jijọho po mẹ. Etẹwutu? Podọ nawẹ gblọndo lọ gando Klistiani lẹ go to egbehe do?
