NGATU tje mo minike omuraranganda woye otja tji mo kapita poye. Ove u muna kutja eye u mu tarera. Tji we mu minike, eye e ku minike okuzambo e ku isana. Nu a tja: “Hi ku pure otjiṋa? Hapo otjikeṋa tji tji tjita kutja mu panguke kovandu varwe?” Ove opura kutja, “Mo hee vi nao?” Eye a tja: “Oweṋe Ovahongonone vaJehova nu? Eṋe kamu ri tjimuna ovandu varwe. Kamu ri tjimuna ozokereka zarwe, kamu nyanda omikandi vyomayuva womasuviro nu nandarire kamu rihitisa moviṋa vyopolitika novita. Kamu pepe omakaya. Nu eṱunḓu reṋu ri novikaro oviwa. Hapo otjikeṋa tji tji tjita kutja mu panguke tjinene nao kovandu varwe?”

Ove mo tjiwa kutja eziriro kepuriro ndo orondi rokutja, eṱe tu riwisa kehi yOuhona waMukuru. Jesus otjOmbara yetu, u tu kohorora. Eye u tu vatera kutja tu kayende mozondambo ze, nu momuano mbo tu panguke kouye ourunde mbwi. Morupa ndwi, matu kamuna omuano Ouhona waMukuru mbu honaparerwa i Messias mu wa kohorora ovakarere vaMukuru mombepo, mongaro yomeritjindiro nokukohorora otjira atjihe kutja tji ete ondjozikiro ku Jehova.