WHO muẹrohọ nọ ohwo jọ nọ wha gbẹ rrọ iyẹrẹ ọ be hai rri owhẹ avọ uviuwou ra nọ wha tẹ be nyavrẹ. Ẹdẹjọ, who te yere iei, ọyomariẹ o te yere owhẹ, kẹsena o te se owhẹ nọ whọ wẹriẹ. Ọ tẹ ta kẹ owhẹ nọ: “Ivie, mẹ gwọlọ nọ owhẹ onọ jọ. Mẹ ruẹ nọ whẹ avọ uviuwou ra wha wo ohẹriẹ no amọfa, eme ọ soriẹ ze?” Whọ tẹ ta nọ: “Mẹ nwani wo otoriẹ ẹme ra na ha.” Ọ tẹ ta nọ: “Mẹ riẹ nọ whai yọ Isẹri Jihova. Wha wọhọ amọfa ha. Wha wo ohẹriẹ no ahwo egagọ efa, wha re ru ehaa nọ egagọ edekọ a re ru hu, yọ wha re dhomahọ esuo-ohrowo gbe ẹmo-ofio ho. Wha re vovo isigareti hi. Yọ whẹ avọ ahwo uviuwou ra wha wo emamọ uruemu, wha tẹ jẹ rrọ kpatiẹ. Eme ọ wha riẹ ze nọ wha rọ nwani wo ohẹriẹ no amọfa ga tere?”

Whọ riẹ nọ oware nọ o soriẹ ze họ: Ma bi yoẹme kẹ esuo Ọghẹnẹ. Jesu nọ ọ rrọ Ovie ọrọ Uvie Ọghẹnẹ o bi ru omai fo n’oke t’oke. O bi fiobọhọ kẹ omai rọ aro kele iei, re ma wo ohẹriẹ no amọfa evaọ akpọ omuomu nana. Evaọ abọ nana, ma te ruẹ epanọ Uvie Mesaya na u bi ro ru idibo Ọghẹnẹ fo evaọ ofẹ iwuhrẹ, uruemu, gbe ẹruorote iruẹru ukoko na, yọ enana kpobi e be wha orro se Jihova.