KWASŨANĨA wĩsĩle vakuvĩ na kwa mũtũi waku, na ũvĩtĩte ũimũkĩlĩlya kwʼoko. Nĩwonete kana matukũ manini mavĩtu, mũtũi ũsu nĩwĩthĩĩtwe ayendeewʼa mũno nue na mũsyĩ waku. Ĩtina wa wamũkĩlĩlya kwʼoko, o nake aikũkĩlĩlya kwʼoko na aikwĩta. Na ĩndĩ aikwĩa atĩĩ: “No ngũkũlye kaũndũ? Nĩ kyaũ kĩtumaa mwĩthĩwa mwĩ kĩvathũkanyʼo na andũ ala angĩ?” Naku ũimũkũlya, “Nĩkĩ wangũlya ũu?” Nake aikwĩa, “Inywʼĩ mwĩ Ngũsĩ sya Yeova, ti wʼo? Mwĩ kĩvathũkanyʼo vyũ na andũ ala angĩ. Mũivwʼanene na ndĩni ila ingĩ nũndũ mũitanĩaa sikũkũ, kana kũlika siasanĩ na kaũnĩ. O na mũinyusaa sikala. Na andũ ma mĩsyĩ yenyu monekaa me na mwĩkalĩle mũseo mũno. No ũngelesye nĩ kyaũ kĩtumaa mwĩthĩwa mwĩ kĩvathũkanyʼo maũndũnĩ asu onthe?”

Ĩndĩ wĩ Ngũsĩ ya Yeova nĩwĩsĩ kana twĩthĩawa twĩ kĩvathũkanyʼo nũndũ twĩ ungu wa Ũsumbĩ wa Ngai. Yesũ Mũsumbĩ witũ ethĩĩtwe aitũthesya. Nũendeee kũtũtetheesya tũatĩĩe nyaĩĩ syake, na ũu nũtumaa twĩthĩwa twĩ kĩvathũkanyʼo na nthĩ ĩno nthũku. Nthĩnĩ wa ilungu ila syĩ ĩsomonĩ yĩĩ, nĩtũkwona ũndũ Ũsumbĩ wa Masia wĩthĩĩtwe ũithesya andũ ma Ngai kĩ-veva, kĩ-mwĩkalĩle, na kũmathesya me kĩkundi nĩ kana mamũtaĩe Yeova.