XINGANEKA kuila ua mu kuenda njila anga u bhanga kijimbuete ku vizinhu iê mu ku mu menekena. Mu ku bhita ithangana, u mona kuila muéne ua mu tala kiavulu eie ni muiji uê. Muéne u ku bhanga ué kijimbuete mu ku tambuijila. Muéne u zuela: “Nga mesena ku kuibhula kima. Mukonda diahi enu ki mu difu ni athu a mukuá?” Eie anga u muibhula: “Ihi i ua mesena o kuijiia?” Muéne u ku vutuila: “Enu mu Jimbangi ja Jihova, ki kiene? Enu ki mu difu ni athu a mukuá. Enu ki muene mu di bunda ni jingeleja ja mukuá—ki muene mu bhanga fesa mu izuua ia ku nhoha, ki muene mu di ta mu maka a jinguvulu né kuia mu ita. Ki muene mu buakula. O muiji uê uala ni ukexilu uambote. Ihi iene mu mi kuatekesa ku kala mu athu ambote mu maukexilu avulu?”

O kitambuijilu kia kibhuidisu kiki, kienhiki: Tuene mu kaiela o itumu ia Utuminu ua Nzambi. Kuma Jezú, Sobha ietu, muéne ua mu tu zelesa. Muéne ua mu tu kuatekesa o ku kaiela o makanda mê, phala tu kale tu athu engi ku mundu iú ua iibha. Ku mbandu íii, tua-nda mona kiebhi o Utuminu ua Mexiia kiene mu zelesa o mundu ua Nzambi mu nzumbi, mu ku kala ni ukexilu uambote ku muenhu ni kua longa ku bhanga kiambote o ima—phala ku bhana kijingu kua Jihova.