MUBENA kwenda kabiji mwasokona mukwenu. Pa kupitapo kimye, mwayuka kuba’mba awo muntu umona byo muba anweba ne kisemi kyenu. Naye wimusokona ne kwimwita. Waamba’mba: “Mbena kukeba kwi mwipuzhako. Ki ka kimulengela kupusanako na bantu bonse?” “Mwamushikisha amba, mwatazha mwepi?” Wakumbula amba “Nanchi kechi mwi Bakamonyi ba kwa Yehoba nenyi? Mwapusanako na bantu bonse. Kechi muba byuba bupopweshi bukwabo ne, nabiji kusekelela moba a kukokoloka kabiji kechi mwivwanga mu bya bumulwilantanda ne kulwako nkondo ne. Kechi mupepa fwanka ne. Kabiji kisemi kyenu kiji na byubilo byawama bingi. Ki ka kimulengela kupusanako na bantu bonse mu bintu byavula?”

Mukumbu ke wa kuba’mba tutangijilwa na bukalama bwa Bufumu bwa Lesa. Yesu byo aji Mfumu, ubena kwitutokesha. Ubena kwitukwasha kulondela mu ngayo yanji pa kuba’mba tupusaneko na bantu babi ba mu ino ntanda. Mu kino kipungu, tusakufunda pa Bufumu bwa Bumesiasa byo bubena kutokesha bantu ba Lesa ku mupashi, mu byubilo, kabiji ne jibumba jonse pa kuba’mba tulete lukumo kwi Yehoba.