UDI wela muena mutumba nebe muoyo ne tshianza paudi upita mu njila. Udi uvuluka ne: matuku mashale muntu eu uvua ulondesha nsombelu webe ne wa bena mu dîku diebe. Muntu eu udi ukupingajila muoyo, pashishe ukubikila ne tshianza. Udi ukuambila ne: “Ndi njingaku bua kukuela lukonko: Ntshinyi tshidi tshienza bua nuikale bashilangane ne bantu bakuabu?” Udi umuebeja ne: “Udi usua kuamba tshinyi?” Udi ukuandamuna ne: “Nudi Bantemu ba Yehowa, ki mmuomu anyi? Kanuena bu bantu bakuabu to. Kanutu nubuelakana ne bitendelelu bikuabu, bualu kanutu nusekelela mafesto atubu benza ne kanutu nubuelakana mu malu a tshididi ne a mvita nansha. Kanutu nunua makanya. Bidi bimueneka ne: mu mêku enu nutu ne mikenji ya bikadilu mibandile. Ntshinyi tshidi tshienza bua nuikale bashilangane ne bantu bakuabu mu malu a bungi nunku?”

Udi mumanye ne: diandamuna didi ne: Badi batukokesha kudi Bukalenge bua Nzambi. Bu mudi Yezu Mukalenge, utu utulengeja misangu yonso. Udi utuambuluisha bua kuenda mu makasa ende ne bua kuikala bashilangane ne bantu bakuabu mu bulongolodi ebu bubi. Mu tshitupa etshi, netumone mudi Bukalenge bua Masiya bulengeje bantu ba Nzambi mu nyuma, mu bikadilu ne mu mushindu udibu balongolola anu bua butumbi bua Yehowa.