PAR ane ni ikadho ka jirandi kendo ifwayone lweti. Isefwenyo ni nitie kaka osebedo konono yo mutimogo gik moko gi joodi. En bende ofwayoni kae to oluongi. Openjo niya: “Ang’o momiyo un upogoruga?” Kae to idwoke niya: “Itemo wacho nang’o?” Kae to owachoni niya: “Un Joneno mag Jehova, donge? Upogoru gi ji ahinya. Kata dinde mamoko be upogorugo nikech ok utim nyasi ma gitimo, ok udonjru e lweny kod siasa. Onge ng’ato kuomu ma madho ndawa. In be ka ang’iyo joodi, to aneno ka gin gi timbe mabeyo ahinya. Ang’o momiyo upogoru kama yawa?”

Penjogo ok kawwa gi wuoro nikech wang’eyo maler gimomiyo wapogore: Wariwo lwedo Pinyruodh Nyasaye. Yesu piedhowa kinde duto nikech en Ruodhwa. Okonyowa mondo waluw ndache to mano e momiyo watimo gik moko e yo mopogore gi kaka ji timo e piny marachni. E kare mar adekni, wadwaro neno kaka Pinyruodh Mesia osebedo ka piedho jotich Nyasaye kendo pwodhogi mondo gilam Nyasaye e yo moyiego, gibed gi timbe maler, kendo gitim gik moko e yo mochanore. Timo mago duto miyo Jehova duong’.