YÃMB kẽndame n wa yã y yaka, n zẽk y nug n pʋʋs-a. Sẽn nan pa kaoose, y ra mikame t’a gũusda yãmb ne y zakã rãmba. Yẽ me zẽka a nug n pʋʋs la a kams-yã. Yãmb sẽn ta, a yeela woto: “M bõos n sok-y bũmbu. Bõe n kɩt tɩ yãmb ne y zakã rãmb yaa toor ne neb a taabã?” Yãmb sok-a lame yaa: “Bõe yĩng tɩ yãmb sokd woto?” La a yeelame: “Yãmb yaa a Zeova Kaset rãmba, pa sɩda? Yãmb pa wõnd neb a taabã ye. Y pa maand wa tũudum a taabã ye. Wala makre, y pa maand kibs rãmba, y pa kẽesd y toog politikã wall zabã pʋsẽ, y ned baa a ye pa yũud sɩgaar ye. Wõnda yãmb tara noy n tũudẽ tɩ yaa toor ne neb a taabã. Yaa bõe bal n kɩt tɩ yãmb yaa toor woto?”

Leoorã pa toog ye. Yãmb miime tɩ yaa tõnd sẽn sak n lebg Wẽnnaam Rĩungã poorẽ dãmbã yĩnga. A Zezi sẽn yaa Rĩungã Rĩmã manegda a nin-buiidã wakat fãa tɩ b lebgd sõma n paasdẽ. A sõngda tõnd tɩ d rɩkd a togs-n-taare, n yaa toor ne dũni-kãngã nebã. Sags a tãabã sẽn pʋgdã pʋgẽ, d na n yãa Wẽnnaam nebã sẽn paam manegr to-to tũudmã wɛɛngẽ, b manesmã la b minimdã wɛɛngẽ, la b sẽn da sigl to-to wã me pʋgẽ, Wẽnnaam mengã waoogr yĩnga.