ATONU na e faamālō i lou tuaoi a o e savali i le auala. Peitaʻi, na e iloa mulimuli ane, o loo ia mataʻituina lou aiga. O lea, ina ua e toe faamālō atu iā te ia, sa ia talotalo mai e te alu atu. Sa ia fesili mai iā te oe: “Aiseā e ese mai ai outou mai i isi tagata?” Atonu na e fesili i ai po o le ā le uiga o lana tala, peitaʻi na ia toe fesili mai: “O le tou lotu foʻi le Molimau a Ieova? E ese lava outou mai i isi tagata. E lē pei outou o isi lotu, auā e tou te lē faamanatuina aso faamanatu, auai i faiga faapolotiki ma taua, ma e tou te lē ulaula foʻi. E foliga mai e lelei olaga o le tou aiga. O le ā le māfuaaga e ese mai ai outou?”

E faigofie le tali: Talu ai o loo tatou ola i lalo o le pulega a le Malo o le Atua. Ua faamamāina pea i tatou e Iesu talu ona avea o ia ma Tupu. Ua ia fesoasoani mai iā i tatou e mulimuli i ona tulaga aao, ma faaesea ai i tatou mai i lenei lalolagi amioleaga. I lenei vaega, o le a tatou iloiloina ai le auala o loo faamamāina ai pea e le Malo faa-Mesia tagata o le Atua i le itu faaleagaga, tau amio, faapea lana faalapotopotoga, ina ia viia ai Ieova.