CIBEELA 3
Zyeelelo zya Bwami —Kuyandaula Bululami bwa Leza
AMWEEZYEEZYE kuti mwabbaibbisya simukobonyoko nomwainda kumbali aamunzi wakwe. Mazuba aano mubona kuti ulavwula kumulangilila nywebo amukwasyi wanu. Awalo wamubbaibbisya mpoonya wamoobola ajanza kuti muunke kulinguwe. Wati: “Sena inga ndabuzya? Ino nywebo nobantu ncinzi cimupa kwiindana kapati abantu bambi?” Mpoonya nywebo mwamubuzya mweenzyinyoko kuti: “Ino mupandulula nzi?” Ulaamba ategwa: “Muli Bakamboni ba Jehova tee kayi? Muliindene abantu bambi. Tamuciti nzyozicita zikombelo zimbi—tamusekeleli mazuba aakulyookezya, alimwi tamutoli lubazu mutwaambo twacisi amunkondo. Taakwe naba omwe uufweba akati kanu. Alimwi buya mukwasyi wanu ulibonya kuti utobela zyeelelo zyakulilemeka zisumpukide. Ino ncinzi cimupa kwiindana boobu muzintu zinji?”
Mulizi kuti bwiinguzi buyeeme buyo acintu comwe: Tupona ansi abweendelezi bwa Bwami bwa Leza. Mbwali Mwami, Jesu ulimukutusalazya. Ulatugwasya kweenda mumikondo yakwe, calo citupa kuti twiindane abantu bambi munyika eeyi mbyaabi. Mucibeela eeci, tulabona Bwami bwa Mesiya mbobwali kubasalazya bantu ba Leza kumuuya, mukulilemeka, alimwi amumbunga—kutegwa Jehova alemekwe.
MUCIBEELA EECI
CIBALO 11
Kusalazyigwa Mukulilemeka —Ikutondezya Busalali bwa Leza
Twaanda twabalindizi munzila yamilyango yatempele yamucilengaano ca Ezekieli tulijisi bupanduluzi bwaalubazu kubantu ba Leza kuzwa mu 1914.
CIBALO 12
Bakamantene Kubelekela “Leza Waluumuno”
Ibbaibbele liindanya lupyopyongano kuluumuno. Ino nkaambo nzi? Alimwi ino bwiinguzi kumubuzyo ooyu kubajatikizya buti Banakristo mazuba aano?