U XEWETA muakelani wa wena loko u ri karhi u hundza. Endzhakunyana, u xiya leswaku i khale a ri karhi a mi langutile wena ni ndyangu wa wena. Na yena wa ku xeweta kutani a sungula ku vulavula na wena. U ri: “Xana ndzi nga ku vutisa swin’wana? I yini lexi mi endlaka mi hambana ni vanhu van’wana?” Hi loko u n’wi vutisa u ku: “Ha yini u vula tano?” Kutani a ku, “Mi Timbhoni ta Yehovha, a hi swona ke? Mi hambanile ni vanhu van’wana. Vukhongeri bya n’wina byi hambanile ni lebyin’wana—a mi tlangeli tiholideyi naswona a mi katseki eka swa tipolitiki ni le tinyimpini. A mi dzahi. Ndyangu wa wena wu vonaka wu hanya hi milawu leyi tlakukeke ya mahanyelo. I yini lexi mi endlaka mi hambana swinene ni vanhu van’wana?”

Nhlamulo ya kona yi olovile: Hi fumiwa hi Mfumo wa Xikwembu. Yesu tanihi Hosi ya wona wa hi tengisa. Wa hi pfuna leswaku hi famba endleleni yakwe xisweswo hi hambana ni misava leyi yo homboloka. Eka xiyenge lexi, hi ta vona ndlela leyi Mfumo wa Mesiya wu va tengiseke ha yona vanhu va Xikwembu hi tlhelo ra moya ni ra mahanyelo swin’we ni le nhlengeletanweni.