U TLAKUSELA woko a muakelani wa wena a xikhati lexi u hunzako. Kanilezi u polile lezaku i simama a mu cuwuka, wena ni ngango wa wena. Loku u cuwuka nzhako yena o ku khweneta, a guma aku: “Nzi nga ku maha xiwutiso? Zini zi mu mahako mu hambana nguvu ni vanwani?” U hlamula uku: “Hikuyini?” Yena aku: “Kambe nwina mu Timboni ta Jehova, a hi zona? A mu fani ni vanwani. Ma hambana ni tinwani tichechi — a mugi makhisimuso, niku a mu ngheneli za wupolitika ge hambu kuya wusochweni. A mu dzahi. A ngango wa wena kambe wu wonekisa ku khwatsi wu na ni mahanyela ma nene. Kasi xini xi mu hambanyisako nguvu na hina?”

Wa zi tiva lezaku a hlamulo wa kona wunwe: Hi fumelwa hi milayo ya Mufumo wa Nungungulu. Kota Hosi, Jesu i tshama hi ku hi vuna kuva vanhu va chukwana. I hi vuna a ku lanzela nkonzo wakwe, lezaku hi hambana ni tiko legi go biha. Ka xipanze lexi, hi ta wona lezi a Mufumo wa wuMessia wu tako na wu hi chukwatisisa zona hi tlhelo ga moya, ga mahanyela, ni ga wuhlengeli — lezaku hi dzunza Jehova.