OVE pamue o linga ondimbukiso leka komunu o lisungue laye. Oloneke vimue, wa limbuka okuti omunu waco wa siata oku ku mola kumue lepata liove. Eye o lingavo ondimbukiso leka, ndu a lekisa okuti o yongola oku vangula love. Eye o popia hati: “Citava hẽ okuti ndu ku linga epulilo limue? Momo lie ka vu kasilili ndomanu vakuavo?” Ove u pulavo ndoco: “Konepa yipi?” Eye o tambulula ndoco: “Siti epata liove Olombangi Via Yehova? Ene wa litepi lomanu vakuavo. Ka vu kasi ndatavo akuavo, momo ka vu pangi onepa kovipito violuali, ka vu litengi vopulitika ndaño kovoyaki. Ka vu sipi kuenda ndi sima okuti epata liove li kuete olonumbi via velapo. Momo lie ka vu kasilili ndomanu vakuavo?”

Wa kũlĩha okuti etambululo liaco li tunda kondaka yimosi yokuti: Etu tu kasi vemehi liuviali Wusoma wa Suku. Omo okuti Yesu Osoma, wa siata oku tu mioñolola olonjanja viosi. Eye o tu kuatisa oku kuama ongangu yaye oco tu litepe loluali lulo lua vĩha. Vonepa eyi tu ka limbuka ndomo Usoma wa Mesiya wa siata oku mioñolola afendeli va Suku konepa yespiritu, kovituwa, kuenda kalongiso ocisoko. Kuenje, ovina viaco vi eca esivayo ku Yehova.