NI LUMELISA muhura waṋu nga u mu imisela tshanḓa musi ni tshi khou fhira. Nga murahu na zwi ṱhogomela uri ndi kale o ḓi ni sedza na muṱa waṋu. Na ene u a ni imisela tshanḓa a ni lumelisa nahone a ni vhidza. Ni tshi swika u ri: “Ndi khou humbela u ni vhudzisa zwiṅwe zwithu? Ndi ngani no fhambana na vhaṅwe vhathu?” Ni a mu vhudzisa: “Ndi ngani ni tshi ralo?” A tshi fhindula u ri: “Vhoiwe ni Ṱhanzi dza Yehova, a si zwone kani? A ni fani na vhaṅwe vhathu. A ni iti zwithu zwine zwa itwa nga dziṅwe kereke—a ni pembeleli dziholodei, a ni dzheneleli kha zwa politiki na dzinndwa. A hu na na muthihi wa vhoiwe ane a daha. Muṱa wa vhoiwe u vhonala u tshi tshila nga nḓila yavhuḓi. Ndi ngani no fhambana tshoṱhe na vhaṅwe vhathu?”

Ni a zwi ḓivha uri phindulo ndi nthihi fhedzi: Ri tshila nga fhasi ha vhuvhusi ha Muvhuso wa Mudzimu. Samusi Yesu e Khosi, u dzula a tshi ri kunakisa. U ri thusa uri ri mu edzise hu u itela uri ri vhe vhathu vho fhambanaho na ḽino shango ḽivhi. Kha yeneyi khethekanyo, ri ḓo vhona nḓila ye Muvhuso wa Vhumessia wa vha u tshi khou ḓi kunakisa ngayo vhathu vha Mudzimu muyani, kha matshilele na ndanguloni—hu u itela u ṋea Yehova vhugala.