BENƐ o kɛ nyɛmi ko ngɛ fiɛɛe ngɛ wehi a mi ɔ, nyɛ nu polisi lɔle bɛ ko he ngɛ tsitsaa. Bɛ ɔ nya ngɛ wae. Benɛ nyɛ sɛ we nɛ tsa nɔ ɔ mi nɛ o kɛ wetsɛ ɔ ngɛ ní sɛɛe ɔ, polisi lɔle ɔ ba da si ngɛ nyɛ kasa nya, nɛ lɔ ɔ gbla nɔ nɛ o kɛ lɛ ngɛ fiɛɛe ɔ juɛmi kɛ je fiɛɛmi ɔ nɔ. Polisi ko je kpo ngɛ lɔle ɔ mi, nɛ e ba bi nyɛ ke: “Anɛ nyɛ nɛ nyɛ ngɛ Baiblo ɔ he munyu tue ngɛ nihi a wehi a mi ɔ lo? Amaniɛ bɔmi nɛ wa nine su nɔ ɔ tsɔɔ kaa nyɛ ngɛ nihi haoe!” Nyɛɛ kɛ bu ha heto, nɛ nyɛ je nyɛ he si kaa Yehowa Odasefohi ji nyɛ. Mɛni maa ba ngɛ lɔ ɔ se?

E maa da bɔ nɛ a peeɔ Yehowa Odasefohi ha ngɛ he nɛ o ngɛ ɔ nɔ. Ngɛ jehahi nɛ be ɔmɛ a mi ɔ, kɛ amlaalo ɔ kɛ Yehowa Odasefohi nɛ a ngɛ o ma a mi ɔ ye ha kɛɛ? Anɛ nihi ngɛ he blɔ nɛ a jaa Mawu ngɛ ma a mi lo? Ke jã a, lɛɛ eko ɔ, mɔde nɛ wa nyɛmimɛ Kristofohi bɔ kɛ ‘fa sane kpakpa a he nɛ a kɛ wo mlaa sisi’ ɔ lɛ ha nɛ e ba jã a nɛ. (Filip. 1:7, NW) Ngɛ he saisaa nɛ wa ngɛ ɔ, ke wa susu kunimihi nɛ Yehowa Odasefohi ye ngɛ kojomi hehi ɔ he ɔ, e ma nyɛ maa wo wa hemi kɛ yemi mi he wami. Ngɛ fã nɛ ɔ mi ɔ, wa ma susu kunimi nɛ wa ye ɔ ekomɛ a he. Kunimi nɛ wa ye ɔmɛ ji odase nɛ tsɔɔ kaa Matsɛ Yemi ɔ ji nɔ yemi nitsɛnitsɛ, ejakaa ke pi Matsɛ Yemi ɔ he ɔ, wa ko yí kunimi ngɛ wɔ nitsɛmɛ wa he wami nya!