UTAT uta yatiykasin polician autopas warartʼasis jakʼachasisinkaspa ukham amuytʼañäni. Yatiyir masimampiw mä chachar parlañ qalltapjjtajja, ukhamaruw polician autopajj jumanak nayraqatar saytʼi ukat autot mistunisajj akham sasaw policiajj jisktʼapjjtamjja: “¿Jumanakat utat uta Bibliat yatiyasipkayäta? ¡Waljaniw jumanakat quejasipjje!” sasa. Jumasa ukat yatiyir masimasa, wali respetompiw ‘Jehová Diosan Qhanañchirinakapäpjjtwa’ sasin sapjjtajja. ¿Kunas jichhajj paspachäni?

Markamanjja, ¿kunjamsa marka apnaqerinakajj Jehová Diosan Qhanañchirinakapar uñjapjjäna? ¿Diosar yupaychañan jarkʼatäpjjtati? Jilat kullakanakan walja maranak wal chʼamachasipjjatap laykuw yaqhep markanakan Diosar yupaychañajj jan jarkʼatäkiti, jupanakajj ‘autoridadanak nayraqatanwa arsuwayapjje ukat qhespiyasiñ arunaksa arjjatawayapjjarakiwa’ (Fili. 1:7). Cheqansa, Jehová Diosan Qhanañchirinakapajj kunjamsa tribunalanakan atipjawayapjje uk yatjjatañaw Diosar jukʼamp confiyañatakejj yanaptʼistani. Uka toqetwa aka jaljan mä qawqhanak uñjaskañäni. Tribunalanakan juicionak atipjawayktan ukanakajja, Diosan Reinopan apnaqjjatapwa uñachtʼayistu, janiw chʼamasampikejj ukanak atipjkasänti.