MIIRI k’a filɛ ko i be waajuli kɛra soo ni soo, ani i ye polisiw ka mobili mankan mɛn yɔrɔjan na. I y’a ye ko dɔ be farala o mankan kan ka taga. K’i to kuma na n’i lamɛnnikɛla ye, i tɔɲɔgɔn be filɛri kɛra yɔrɔ wɛrɛ sabu polisiw ka mobili lɔra. Polisicɛ dɔ bɔra a kɔnɔ ka gwɛrɛ aw la ani k’aw ɲininga ko: “Alu lo be tagara soo ni soo ani ka kuma ni mɔgɔw ye Bibulu koo la wa? Mɔgɔ dɔw y’an weele k’a fɔ ko aw be min kɛra o m’an di u ye.” Aw b’u jaabi ni bonya ye ani aw b’a fɔ u ye ko aw ye Jehova Seerew lo ye. Mun lo bena kɛ o kɔ?

Walisa k’o lɔn, a filɛ fɔlɔ jamana ka faamanw be Jehova Seerew jati cogo min na. Saan caaman tɛmɛninw na, aw ka jamana ka gofɛrɛnɛman ye Jehova Seerew minɛ cogo di? Yala u be se k’u ka batolikow kɛ ɲɛsuma na wa? N’o lo, o kɔrɔ ko balimaw ye baaraba lo kɛ saan caaman kɔnɔ walisa ka ‘kibaro diiman lafasa ani k’a sabati’ sariya ɲɛɛ kɔrɔ (Filip. 1:7, Bible senuma). Jehova Seerew ye see sɔrɔ kitiko minw na, i mana kɛ yɔrɔ o yɔrɔ, n’i miirila o la, o be se k’i ka limaniya barika bonya. Tilanyɔrɔ nin na, an bena kuma o sesɔrɔli kabakoman dɔw koo la. U b’a yira ka gwɛ ko Ala ka Masaya ye tiɲɛnko lo ye sabu n’ale sababu tun tɛ, an tun tɛna se ka see sɔrɔ an yɛrɛ ka setigiya barika la.