OOSHIƐ yɛ shĩai amli kɛkɛ ni onu ni polisifoi atsɔne ko miibolo yɛ shɔŋŋ kɛmiiba. Be ni ebɛŋkɛɔ lɛ, gbɛɛmɔ lɛ naa miiwa. Be ni okɛ shĩatsɛ ni tsa nɔ lɛ bɔi wiemɔ lɛ, polisifoi atsɔne lɛ bama shi blɛoo, ni nyɛmi ni fata ohe kɛshiɛɔ lɛ tsui fã fioo. Polisifonyo ko yi shi yɛ tsɔne lɛ mli ni ebabi akɛ: “Ani nyɛyi enyɔ nɛɛ ji mɛi ni yaa mɛi ashinai anaa nyɛkɛ amɛ yagbaa Biblia mli saji lɛ lo? Mɛi ebɔbɔɔ wɔ amaniɛ akɛ nyɛnifeemɔ lɛ miigba amɛnaa tsɔ!” Nyɛjɛ bulɛ mli nyɛhã amɛ hetoo, ni nyɛjie nyɛhe shi akɛ Yehowa Odasefoi ji nyɛ. Mɛni baanyiɛ sɛɛ?

Yɛ shihilɛ babaoo mli lɛ, ebaadamɔ nɔ ni eba pɛŋ lɛ nɔ. Te nɔyeli ni yɔɔ maŋ ni oyɔɔ nɔ lɛ kɛ Yehowa Odasefoi eye ehã tɛŋŋ yɛ afii ni eho lɛ amli? Ani jamɔŋ heyeli yɛ jɛmɛ bɔ ni sa? Kɛ́ nakai lɛ, ekolɛ ebaadamɔ bɔ ni onyɛmimɛi Kristofoi ni hi shi afii nyɔŋmai komɛi ni eho lɛ gbo deŋme ‘kɛfã sane kpakpa lɛ he kɛma nɔ mi yɛ mla naa’ amɛhã lɛ nɔ. (Fil. 1:7) Ekɔɔɔ he eko he ni oyɔɔ lɛ, kɛ́ ojwɛŋ kunim srɔtoi ni Yehowa Odasefoi eye yɛ saneyelihei lɛ anɔ lɛ, ebaawaje ohemɔkɛyeli lɛ waa. Wɔbaasusu kunimyelii ni sa kadimɔ jogbaŋŋ lɛ ekomɛi ahe yɛ fã nɛɛ mli. Kunim srɔtoi ni wɔye lɛ ji odaseyeli kpele ni tsɔɔ akɛ Maŋtsɛyeli lɛ ji nɔ ko ni yɔɔ diɛŋtsɛ, ejaakɛ kɛ́ ka wɔ sɔŋŋ kulɛ, wɔnyɛŋ kunim babaoo nɛɛ wɔye kɔkɔɔkɔ!