NGATU tje mo zuvarisa okuza kondjuwo nondjuwo, nu ookuzuva ombosiro yohauto yoporise okuza kokure. Noyo ai utu okuzuvakera ko tjinene. Ngunda amo hungire ku nomunionganda pondjuwo oitjakwao, omukweṋu ngu mamu zuvarisa pamwe a munu ohauto yoporise ndje ya okukurama pondjuwo pu mamu zuvarisa. Omuporise arire tja heruka na pura kutja, “Oweṋe mbu mamu ryanga okuza kondjuwo nondjuwo okuhungira ku novandu ohunga nOmbeibela? Ovandu ovengi mave unauna ohunga na eṋe!” Eṋe amu ziri nondengero namu ritjiukisa kutja oweṋe Ovahongonone vaJehova. Maku kongorere tjike?

Ovikongorere ko mavi zu kekuruhungi rehi reṋu. Mozombura nḓa kapita, ohoromende yehi mu wa tura aai tjindi vi Ovahongonone vaJehova? I yandjera ovandu okukara nongamburiro yawo oveni poo indee? Tji peri nao, ngahino omena romuano ovakambure ovakweṋu ozombura nḓa kapita mu va ungura oukukutu ‘okuyeura ombuze ombwa mombanguriro nokuhongonona ouatjiri.’ (Fil. 1:7) Kainatja kutja wa tura pi, tji we ripurire oukoto komuano Ovahongonone vaJehova mu va kara nondoṋeno onene movyombanguriro, maku yanḓiparisa ongamburiro yoye. Morupa ndwi matu katara kondoṋeno ohimise ndji twa kara na yo. Ondoṋeno yetu ndjo otjiraisiro otjiwa tjokutja Ouhona otjiṋa tjatjiri, orondu katja tu yenena okutoṋa pu pe ṱeki mbo momasa wetu oveni!