KWASŨANĨA ũendeee kũtavanyʼa nyũmba na nyũmba, na ũyĩwʼa kĩngʼola kĩĩĩte kĩ kũasa, na wasya wakyo ũyĩendeea kwongeleka. Na wambĩĩa kũneena na mwene nyũmba oou, kĩlĩko kya ũla ũũtavanasya nake kĩyelelũka oona ngalĩ ya volisi yaũngama vakuvĩ nenyu. Ngalĩ ĩsu yamina kũũngama, mũsikalĩ ayuma na ayũka vala mũĩ, na aimũkũlya atĩĩ: “Nĩenda kũmanya kana ninywʼĩ mwĩthĩĩtwe mũithi nyũmba na nyũmba na kũneena na andũ ĩũlũ wa Mbivilia? Andũ nĩmethĩĩtwe mailalamĩka nũndũ wenyu!” We na ũla ũũtavanasya nake mũineena na mũsikalĩ ũsu na ndaĩa, na mũimũtavya kana inywʼĩ mwĩ Ngũsĩ sya Yeova. Yu wĩona ta vatonya kũthi ata?

Ũsũngĩo wa ĩkũlyo yĩu wĩtengemea ũndũ maũndũ methĩĩtwe mailyĩ ĩvinda ĩvĩtu. Myakanĩ mĩvĩtu, silikalĩ ya nthĩ ĩla wĩkalaa yĩthĩĩtwe ĩikua ata Ngũsĩ sya Yeova? Nĩvethĩĩtwe na ũthasyo wa kũthaitha? Ethĩwa ũu nĩwʼo vailyĩ, nĩvatonyeka ũkethĩa kwa myaka mingĩ, ana-a-asa na eĩtu-a-asa maku nĩmekĩĩte kĩthito “kũwũkitĩa na kũlũlũmĩlya ũla ũvoo mũseo,” kana kwa ndeto ingĩ, kũũtetea na kũũlũlũmĩĩlya kĩ-mĩao. (Avi. 1:7) Kwoou o na ethĩwa wĩkalaa va ĩũlũ wa nthĩ, nũtonya kwĩkĩwa vinya mũno wasũanĩa ĩũlũ wa ũsindi ũla Ngũsĩ sya Yeova ikwatĩte nthĩnĩ wa makoani me kĩvathũkanyʼo kotinĩ. Nthĩnĩ wa ĩsomo yĩĩ, nĩtũũsisya amwe ma makoani asu. Ũsindi ũsu wĩĩkĩĩthya vyũ kana Ũsumbĩ wa Ngai nĩ silikalĩ ya wʼo ĩsumbĩkĩte ũmũnthĩ, kĩtumi nũndũ ũsindi ta ũsu ndũtonya kũkwatĩkana tũtatetheewʼe nĩ Ũsumbĩ!