YINDULA nde beno ke samuna nzo na nzo, mpi beno me wa makelele ya kamio ya bapolisi na ntama. Malembe-malembe yo ke kuma ngolo. Ntangu nge ke yantika kusolula ti muntu na lupangu ya ke landa, kamio ya bapolisi me telama, mpi mpangi yina ke samuna ti nge me tala bo. Polisi mosi me basika; yandi me pusana, mpi ke yula nde: “Keti beno ke kwenda nzo na nzo sambu na kutubila mambu ya me tala Biblia? Bantu me funda beno!” Beno me pesa mvutu na luzitu yonso, mpi me monisa nde beno kele Bambangi ya Yehowa. Inki ta kumina beno na nima?

Yo ke tadila mutindu mambu ke salamaka na bwala na beno. Inki mambu bamfumu ya leta me salaka Bambangi ya Yehowa na nsungi ya bamvula mingi? Keti beno kele ti kimpwanza ya kusambila? Kana beno kele ti kimpwanza, ntembe kele ve nde yo kele sambu bampangi na beno ya kimpeve me salaka bikesa bamvula mingi sambu na “kuzwa nswa ya leta ya kusamuna nsangu ya mbote.” (Baf. 1:7) Ata nge ke zingaka na wapi, lukwikilu na nge ta kuma ngolo ntangu beto ta tadila mambu yina Bambangi ya Yehowa me nungaka na batribinale. Na kitini yai, beto ta tadila mambu ya kuyituka yina beto me nungaka. Mambu yonso ya beto ke nungaka na batribinale ke monisaka pwelele nde Kimfumu ya Nzambi kele kima ya kieleka, sambu beto lenda nunga ve na ngolo na beto mosi!