NATU tye nee ngeno fimbo tamu longo eumbo neumbo, omu udite onghuwo yelondwelo yembaba lopolifi nomu udite kutya otali xweenene. Eshi ngoo mwa hovela okupopya nomuneumbo, ou wete mukweni oo tamu longo pamwe naye ta keuka embaba lopolifi olo le uya punye. Opo nee omwa dja omupolifi, te mu pula ta ti: “Nye vavali ndi shii onye tamu ende eumbo neumbo tamu udifa kombinga yOmbibeli? Ovanhu ove mu lopota kutya ove mu kenyanana!” Opo nee omwe mu nyamukula nefimaneko, tamu yelifa kutya nye Eendombwedi daJehova. Oshike tashi dulika shi mu ningilwe pomhito ya tya ngaho?

Luhapu osho ohashi likolele ketaleko lepangelo li na sha nEendombwedi daJehova. Epangelo lomoshilongo sheni ola kala tali ungaunga ngahelipi nEendombwedi momido da pita? Mbela ovanhu moshilongo sheni ova pitikwa va kale melongelokalunga olo va hoolola? Ngeenge osho, otashi dulika ovamwatate novamwameme moshilongo sheni va li va longa noudiinini oule womido omilongo opo va “amene nokupopila paveta onghundana iwa.” (Fil. 1:7, NW) Ndele kashi na nee mbudi kutya ou li moshilongo shilipi, otashi ka pameka eitavelo loye ngeenge owa konakona kombinga yoibofa yopamhangu oyo Eendombwedi daJehova da findana. Ohatu ka tala koibofa imwe ya tya ngaho moshituklwa eshi. Omafindano a tya ngaho otaa yandje oumbangi wa kola kutya Ouhamba otau pangele shili, molwaashi ngeno kawa li po, ngeno katu na lela eshi twa dula okupondola kufye vene.