MUBENA kusapwila ku nzubo ku nzubo kabiji mwaumvwa alamu yajila. Kabiji yatendeka kumvwanyikisha. Byo mwafika pa nzubo ikwabo, ye mubena kwingila nanji waleka kusapwila na mambo a motoka wa bakapokola waiya. Kapokola waikila mu motoka ne kwimushikisha amba: “Nanchi yenu mubena kuya na kusapwila pa Baibolo ku nzubo ku nzubo nyi? Twaumvwa bantu babena kwambapo bingi!” Mwibakumbula na mushingi kuba’mba twi Bakamonyi ba kwa Yehoba. Ki ka kisakumweka?

Bisakulondelapo byakonsha kwimena pa byakimwekapo kala ku yoyo mpunzha. Pa myaka yapitapo, nga kafulumende wa mu kyalo kyenu umona byepi Bakamonyi ba kwa Yehoba? Nanchi baswisha kupopwela nyi? Umvwe byobyo kiji, ko kuba’mba balongo ne banyenga bajingako kala baingijile bingi na ngovu ‘kulwila mambo awama ne kutambula lūsa lwa kwiasapwila.’ (Fili. 1:7) Kuji konse ko mwikela, kulanguluka pa mambo a bingile Bakamonyi ba kwa Yehoba kwakonsha kulengela lwitabilo lwenu kukoselako. Mu kino kipungu, tusakufunda pa bintu bya uno mutundu byamwekele kala. Kubinga mambo mu kochi kumwesha kuba’mba Bufumu bwa kine, mambo bino byonse kechi twakonsha kwibyuba na bulume bwetu ne!