TU TANTE asi moyirugana yokuzuvhisa muna kara. Haruka ko, tomu mono etuwa lyovaporosi kuna kuwiza, makura tali ya mu sikamene. Makura muporosi ta humburuka nokumupura asi: “Nyone muna kuza momambo govantu mu zuvhise ndi? Vantu kuna kusivana kumuhamena!” One tomu limburura nefumadeko asi one Nombangi daJehova. Yisinke nava mu rugana?

Ayo kwa korera kweyi lya rugene nare epangero Nombangi daJehova mosirongo seni. Epangero lya mu pulisira paveta mu zuvhise ndi? Nsene yimo, eyi kulikida asi vapuli vakweni kwa rugene ko yuma “pokukoreka mbudi zongwa paveta.” (Fil. 1:7, NW) Pokuteda ko komafundo gopaveta goNombangi daJehova kuvhura kunkondopeka epuro lyoge. Moruha oru, tatu ka konakona mafundo gamwe. Ago kugava umbangi asi Uhompa yipo wa kara, morwa ngano kapi twa fundire pwanyamwetu.