ACHISHINGANYEKENU munakwambulwila kuzuvo hizuvo, kaha namwivwa nge kuli mutu anakumitambakana. Kutwala muze uze anakumitambakana mwaheta mwakamwihi. Omu namuputuka kuhanjika nayou mutu, uze munakuzata nenyi mwamona tupokola vanakwiza. Kapokola umwe mwapandama kuli yenu nakwamba ngwenyi: “Enu yenu munakuhita kujizuvo javatu nakuhanjika havihande vyamuMbimbiliya tahi? Vatu vanakuyayavala chikuma hali yenu.” Kaha namuvakumbulula mukalemesa nakulijimbula ngwenu mwapwa muVinjiho jaYehova. Vyuma muka navikavangizaho?

Vyuma navikavangizaho navipendamina havyuma vyasolokele kunyima. Fulumende yamulifuchi lyenu yamona ngachilihi Vinjiho jaYehova? Kutala vamihana lisesa lyakulemesa Kalunga tahi? Nge mukiko, kaha tachikizenu ngwenu vamitavisa mwomwo vandumbwetu vakilikichile nangolo kunyima mangana vahakwile “mujimbu wamwaza nakuuzamisa najishimbi.” (Fwili. 1:7) Shikaho tutalenu omu Vinjiho jaYehova vanafungululanga vihande kujizango jakusopela, nomu nachizamisa lufwelelo lwenu. Muchihanda chino natushimutwila havihande vimwe vanasoponga. Kufungulula kanechi chinasolola hatoma nge Wangana unakuyula, mwomwo mungolo jetu kaha kachi katwahashile kufungulula vihande kanako.