PAR ane ni ilendo ot ka ot, to iwinjo dwond king’ora ka ywak gi chien. Kaka dakika medo kalo e kaka dwolno bende medore. Ka iomo ni ichako wuoyo e ot ma luwo, jalendo ma un-go neno ka mtok polis chung’ butu kanyo. Polis moro wuok e mtokano, kae to ochomo iru tir kopenjo niya: “Dibed ni un e ma udhi e ute ji kuwuoyo kuom Muma? Waseyudo ripot ni uchando ji!” Idwoko polisego e yo mamuol kinyisogi ni un Joneno mag Jehova. Ang’o ma timore bang’ mano?

Gima biro timore kanyo biro luwore gi paro ma sirkandu osebedogago kuomu. Kuom ranyisi, sirkal mar pinyu osebedo ka kawo nade Joneno mag Jehova? Be gimiyo Joneno ratiro mar lamo ka gin thuolo? Ka en kamano, nyaka bed ni owete gi nyimine ma ni e pinyu osebedo ka timo kinda mondo ‘giti gi chik sirkal e siro ratiro mar wach maber.’ (Fil. 1:7) Bed ni idak e piny mane kata mane, kawo thuolo mar paro matut e wi kes mang’eny ma Joneno mag Jehova oseloyo nyalo jiwi ahinya. E sula adek ma luwogi, wabiro nono moko kuomgi. Bedo ni waseloyo kesgo nyiso ayanga ni Pinyruoth en gima nitie adier nikech di ne ok watimo mago duto gi tekrewa wawegi!