INGCENYE 4
UmBuso Ohlulako —Uhloma Iindaba Ezimnandi Ngokomthetho
AKHESITHI naku usemzini uyatjhumayela, uzwe iwudere ezwakalela kudanyana kodwana itjhada layo likhuphuke kancanikancani. Kuthi nanisacoca nomuntu emzini olandelako, okhambana naye lo athikaziswe yikoloyi yamapholisa ejama ngemva kwenu. Kuphume ipolisa linibuze lithi: “Akusini laba enikhamba ningena imizi yabantu nikhuluma ngeBhayibheli? Abantu banghonghoyila ngani yoke indawo!” Uliphendule ngomoyophasi, ulitjele ukuthi niboFakazi bakaJehova, bese kwenzakalani ngemva kwalokho?
Endabeni le, kuzokuya ngokuthi naziwa njani. Bese umbuzo uba kukuthi, eminyakeni eyadlulako, urhulumende wangekhenu bekasebenzelana njani naboFakazi bakaJehova? Nokuthi nitjhaphuluke kangangani eendabeni zekolo? Nekunjalo-ke kuzokutjho ukuthi abanakwenu nabodadwenu ebebalotjha uZimu ematjhumini weminyaka eyadlulako, bawutjhuka ngazo zombili umsebenzabo ekuvikeleni “kanye nekuqiniseni ivangeli.” (Flp. 1:7) Ukuhlale ucabanga ngomlando ongokomthetho waboFakazi bakaJehova endleleni abahlula ngayo, kungakuqinisa ukukholwa kwakho. Kilengcenye kuzokuqalwa okhunye komlando ophuma phambili lo. Indlela esahlula ngayo yenza sibone ukuthi umBuso lo ngewamambala, begodu le yinto ebengekhe sayenza ngewethu amandla!
ENGCENYENI LE
ISAHLUKO 13
Abatjhumayeli BomBuso Bayokumangala Ekhotho
AmaJaji wemakhotho namhlanjesi alingisa umfundisi womThetho wakade uGamaliyeli.
ISAHLUKO 14
Sisekela UmBuso KaZimu Kwaphela —Omunye Wona Awa!
AboFakazi bakaJehova babhobokelwa “mlambo” wetjhutjhiso ngebanga lokungathathihlangothi kwabo, kodwana amazi lawo aginywa mthombo ebewungakaqalwa nokuqalwa.
ISAHLUKO 15
Ukulwelwa Kwekululeko Yokulotjha UZimu
Abantu bakaZimu balilwele ilungelo labo lokuphila ngokuvumelana nemithetho yomBuso kaZimu.