PUTYINA ukahi nokuivisa umbo na umbo wiva omuyuelo wetuku-tuku liopulisa wivalela kokule. Omuyuelo ufuena popepi. Iya ove na mundyila yove, kamuende vali meumbo ekuavo, mahi, mutai nokuatila owoma putyina etuku-tuku liopulisa litalama. Mutuluka epulisa aliya no puonwe. Alipulu okuti: “Onwe mukahi nokueenda momaumbo okupopia konthele Yombimbiliya? Pena ou welikesala kuonthue!” Iya onwe amukumbulula nehumbilo, okuti onthue, tu-Nombangi mba Jeova. Oityi matyiende po?

Tyitei kuetyi tyilingwa potyilongo tyenyi. Mokueenda kuomanima, oñgeni ovatumini vo potyilongo ukala vatala Onombangi mba Jeova? Okuti vayeka vonongeleya valinge ovilinga viavo? Inkha kavayekwa, otyo tyelifwa netyi tyaendele novakuatate vove no nomphange, valinga ononkhono mokueenda kuomanima omanyingi opo “vayakulile nokuhonekesa onondaka onongwa kovatumini.” (Fil. 1:7) Okunoñgonoka nawa oityi Onombangi mba Jeova valinga pokuhonekesa ovilinga viavo, matyipameka unene ekolelo liove. Monthele ei, matulilongesa omahipululo amwe avilapo konthele oyo. Onomphela tuafinda, mbulekesa okuti Ouhamba wa Huku owotyotyili, mokonda kononkhono mbetu, ñgeno katuetyivilile!