MEKƐ mɔɔ bɛlɛdi daselɛ wɔ azua nu la, ɛte dede bie wɔ moa moa. Akee ɛte kɛ ɔlɛbikye wɔ kpalɛ. Mɔɔ ɛ nee suamenle ne ɛlɛtendɛ la, kpolisi kale bie mɔɔ ɛlɛba la maa wɔ daselɛlilɛ bokavolɛ ne adwenle fi edwɛkɛ ne azo. Kpolisinli ko dwu aze ba bɛ nwo ɛkɛ na ɔbiza kɛ: “Bɛ mu nwiɔ a bɛle menli mɔɔ bɛlɛkɔ azua nu bɛaha Baebolo ne anwo edwɛkɛ la ɔ? Menli se bɛlɛgyegye bɛ!” Bɛfi ɛbulɛ nu bɛbua ye na bɛda bɛ nwo ali kɛ bɛle Gyihova Alasevolɛ. Duzu bieko a bazi a?

Dɔɔnwo ne ala gyi bɛ tetedwɛkɛ zo. Kɛzi arane ne mɔɔ wɔ ɛleka mɔɔ ɛde la ɛyɛ Gyihova Alasevolɛ wɔ ɛvolɛ dɔɔnwo anu ɛ? Bɛlɛ ɛzonlenlɛ nu fanwodi ekyi ɔ? Saa ɔle zɔ a, bie a kɛzi wɔ sunsum nu mediema yɛle gyima ɛsesebɛ wɔ ɛvolɛ dɔɔnwo anu ‘bɛgyinlanle Edwɛkpa ne anzi na bɛvale bɛziele ɛkɛ wɔ mɛla adenle zo’ la ati ɔ. (Fel. 1:7, NW) Wɔ ɛleka biala mɔɔ ɛde la, saa ɛdwenledwenle kɛlɛtokɛ mɔɔ kile konim mɔɔ Gyihova Alasevolɛ ɛli wɔ mɛla adenle zo la anwo a, ɔbahola yeamaa wɔ diedi nu amia. Yɛbazuzu kɛlɛtokɛ ngɛnlɛma ɛhye mɔ bie anwo wɔ foa ɛhye anu. Konim mɔɔ yɛli la di daselɛ kɛ Belemgbunlililɛ ne wɔ ɛkɛ amgba, ɔluakɛ yɛ ngome yɛnrɛhola yɛnrɛyɛ dɔɔnwo ɛlɛ!