LEGAN kayon manpupulong, nitan lay pulis. Nen linma kayod onsublay ya abung, manlingaw so partner mo. Inmepas so pulis tan inmasingger ed sikayo, “Sikayo may oonlad kaabungan ya mangikakalar ed Biblia? Dakel so manrereklamo!” Marespeto kayon inmebat, tan imbaga yon Tasi nen Jehova kayo. Antoy sinmublay ya agawa?

Baleg so agawaan na history tayo. Diad apalabas iran taon, panoy impantrato na gobierno ed Saray Tasi nen Jehova ed lugar yo? Bulos ira kasin makapandadayew? No ontan, nayarin baleg so agawaan na saray agagi tayo manga pigaran dekada lay apalabas. Sikaray ‘angidepensa tan nansagpot pian nawalaan tayoy legal a kanepegan ya mangipulong ed maong a balita.’ (Fil. 1:7) Inerman so kulaan mo, lalon napabiskeg so pananisiam no dalepdepen mo ray impanalo ed korte na Saray Tasi nen Jehova. Diad sayan seksion, pantongtongan tayoy pigarad saray agnalinglingwanan ya eksperiensya. Papaneknekan na saray impanalo tayo ya talagan tua so Panarian, lapud agtayo iratan nagawaan diad dilin biskeg tayo labat!