MBAGE 4
Asongo benda ti Royaume ti Nzapa: Gere ti nzoni tënë aluti ngangu na lege ti ndia
NA NGOI so mo yeke fa tënë da na da, mo ye ti mä so oto ti lapolice ayeke toto yongoro kâ na ayeke pusu nduru nduru. Mo ye ti fa tënë na yanga-da ti peko, mo bâ so ita so mo na lo ayeke fa tënë ayeke bâ ndo na mbage so oto ti lapolice ni aluti dä. Mbeni policier ni asigigi na lo ga nduru na ala, lo tene: “Ala use so la ayeke gue da na da ti fa tënë ti Nzapa so? Azo ayeke dema tere ti ala na e na ndo ti ala!” Mo kiri tënë na nengo lo nga mo fa so mo na ita ni ayeke aTémoin ti Jéhovah. Me nyen la ayeke si na pekoni nyen?
Kiringo tënë ni ayeke gue oko alingbi na ye so asi na yâ ti mbaï ti ndo so mo yeke dä. Teti angu mingi, gouvernement ti ndo so mo yeke dä asara ye tongana nyen na mbage ti aTémoin ti Jéhovah? Azo ayeke na liberté ti vorongo Nzapa ti bê ti ala? Tongana a yeke tongaso, peut-être a yeke ngbanga ti ngangu kua so aita ti mo ti yingo asara teti angu mingi ndali ti “gbungo koko ti nzoni tënë na ti sarango si gere ni aluti ngangu na lege ti ndia.” (aPhil 1:7). Atâa mo yeke na ndo wa, ti gbu li na ndo ti angbanga nde nde so aTémoin ti Jéhovah asö benda dä ayeke sara si mabe ti mo ayeke kiri ti kpengba. Na yâ ti mbage so, e yeke bâ ande ambeni kpengba mbage ti mbaï so. Asongo benda so afa polele so Royaume ni ayeke tâ ye, ngbanga ti so gi e wani e lingbi lâ oko pëpe ti sö benda tongaso.
NA YÂ TI MBAGE SO
CHAPITRE 13
Awafango tënë ti Royaume ague na tënë ti ala na gbele ngbanga
Na yâ ti ambeni Kota da-ngbanga ti laso, ajuge asara ye tongana Gamaliel, wafango Ndia ti giriri.
CHAPITRE 14
Ala mû mbage ti mbeni gouvernement nde pëpe gi ti Nzapa awe
Ambeni zo amene “bale” ti sarango ngangu so atï na ndo ti aTémoin ti Jéhovah ndali ti so ala duti nde na aye ti poroso.
CHAPITRE 15
E tiri ndali ti liberté ti vorongo Nzapa
Awakua ti Nzapa atiri ndali ti droit ti ala ti kpe ndia: ndia ti Royaume ti Nzapa.