మీరు ఇంటింటి పరిచర్య చేస్తూ ఒక ఇంట్లో మాట్లాడుతున్నారు. దూరం నుండి మీకు ఒక సైరన్‌ వినబడింది. ఉండేకొద్దీ అది ఇంకా పెద్దగా వినబడుతోంది. మీరు తర్వాతి ఇంటికి వెళ్లి ఒకతనితో మాట్లాడడం మొదలుపెట్టారు. అంతలోనే పోలీసు కారు వచ్చి అక్కడ ఆగింది. మీతోపాటు వచ్చిన సహోదరి ఆ కారువైపు చూస్తూ ఉంది. దానిలో నుండి ఒక పోలీసు దిగి మీ దగ్గరికి వచ్చాడు. “ఇంటింటికి వెళ్లి బైబిలు గురించి చెప్తుంది మీరేనా? మీ మీద చాలామంది మాకు ఫిర్యాదు చేస్తున్నారు” అన్నాడు. మీరు అతనితో గౌరవపూర్వకంగా మాట్లాడి, మీరు ఒక యెహోవాసాక్షి అని అతనికి చెప్పారు. ఆ తర్వాత ఏమి జరుగుతుంది?

తర్వాత ఏమి జరుగుతుందనేది, గతంలో మీ దేశ ప్రభుత్వం యెహోవాసాక్షులతో ఎలా వ్యవహరించింది; మీ దేశంలో మత స్వేచ్ఛ ఎంతవరకు ఉంది వంటి విషయాల మీదే చాలావరకు ఆధారపడివుంటుంది. బహుశా, ఎన్నో దశాబ్దాల క్రితం మీ సహోదరసహోదరీలు పడిన కష్టానికి ఫలితంగా, ఇప్పుడు మీరు మత స్వేచ్ఛను అనుభవిస్తుండవచ్చు. వాళ్లు “మంచివార్త తరఫున వాదించడానికి, దాన్ని ప్రకటించేలా చట్టబద్ధమైన హక్కును సంపాదించడానికి” ఎంతో ప్రయాసపడ్డారు. (ఫిలి. 1:7) మీరు ఏ దేశంలో నివసిస్తున్నప్పటికీ, వాళ్లు చేసిన చట్టపరమైన పోరాటాల గురించి, సాధించిన విజయాల గురించి తెలుసుకోవడం వల్ల మీ విశ్వాసం బలపడుతుంది. దేవుని రాజ్యం పరిపాలిస్తోందని అవి తిరుగులేని విధంగా రుజువు చేస్తున్నాయి! వాటిలో కొన్నిటిని ఈ భాగంలో పరిశీలిస్తాం.