AKXNI lichuwinampat Dios akgatunu chiki, kgaxpata pi talakatsuwima akgtum patrulla. Akxni tsukuya chuwinana, mincompañero akxilha akxni chin patrulla. Chatum policía taxtu chu kgalhskininan: «¿Wixin tiku lichuwinampatit Biblia kʼakgatunu chiki? Lhuwa kinkawanikgoyan pi ni lakgatikgo tuku tlawayatit». Wix chu mincompañero liwana kawaniyatit pi wixin xtatayananin Jehová. ¿Tuku nakaʼakgspulayan?

Wa nalikatsiya xlakata tuku lanit kminkachikin. Makgasa, ¿la kalikatsinikgonit mapakgsinanin xtatayananin Jehová? ¿Mastakan talakaskin natalichuwinan takanajla? Komo chuna wi, max xlakata natalan akglhuwata kata lhuwa skujmakgolh “nakgalhmakgtayakgo xlakata natalichuwinan xatlan tamakatsin” (Filip. 1:7). Maski xanikuta niku lapat, akxni likgalhtawakgaya la tlajanankgonit xtatayananin Jehová xlakatin mapakgsinanin, namatliwakglha mi takanajla. Kʼuma pulaktati naʼakxilhaw xlakata uma. Tuku tlajananitaw limasiya pi Tamapakgsin xaxlikana, xlakata max nikxni xtlajanaw komo kaj kiakstukan xtitlawaw.