NA MU kari mu xumayela hi muti ni muti, muzwa a guwa ga mova wa maphoyisa hi le kulenyana. Giya gi engetela ku zwala kala gi mu tinga. Zalezo mu sangulako ku wulawula ni nwinyi wa muti, a tipeni ta munghana wa wena a ta ha teki a xikhati lexi a mova wa maphoyisa wu mu tshinelelako. Ku chika phoyisa gi kongoma nwina, giku: “Hi nwina mu fambako hi muti ni muti mu wulawula hi Biblia? Mu kecarilwe hi venyi va miti lezaku mu famba mu va karata!” Hi xichawo, mu mu byela ku mu Timboni ta Jehova. Makunu, zini zi to maheka anzhako ka lezo?

A magumo ya kona ma khegela nguvu ka lezi a matimu ma fambisako zona. Hi malembe, xana a mufumo wa tiko legi u hanyako ka gona wu ti khomisa kuyini a Timboni ta Jehova? Xana mu na ni kutlhatlheka ko kari ka wukhongeli? Loku mu hi nako, zi nga ngha zi kotekile hi kota ya lezi a vamakabye va wena va moya va ti karatileko nguvu lezaku va “vikela ivangeli ni ku yi tiyisa.” (Fil. 1:7) Na ku nga khataliseki lomu u hanyako kona, a ku ehleketa hi matimu ya kuhlula loku a Timboni ta Jehova ti vileko nako tihubyeni ta wulamuli zi nga tiyisa nguvu a kukholwa ka wena. Ka xipanze lexi, hi ta wulawula hi matimu yo kari ya lixaka lelo. A kuhlula ka hina xikombiso xo hlamalisa xa lezaku a Mufumo ngwa lisine, hakuva hi wa nga ta tshuka hi kuma kuhlula loko hi ntamu wa hina venyi!