A KOI talai atu mai fale ki fale, e lagona ne koe se pū e tagi ‵mao mai. E fanaka eiloa o maluga atu tena tagi. I te taimi e kamata ei koe o faipati ki se tino i te suā fale, ko saga fakaa‵tea atu tou ‵pea i te taimi e fakatu mai ei ne te pulisimani tena motoka. E tu mai ki tua se ofisa e tokotasi kae fanatu, o fesili atu: “Ko koulua kolā e olo atu mai fale ki fale o fai‵pati e uiga ki te Tusi Tapu? E isi ne tino ne fameo mai ki a matou e uiga ki a koulua!” E tali atu koulua mo te āva mai te fai atu me i a koulua ne Molimau a Ieova. Se a te mea ne tupu mai tua ifo i ei?

Ne fakalagolago eiloa a mea e uke penei ne ‵tupu ki tala fakasolopito. I te fia o tausaga, ne a faifaiga a te malo o te fenua telā e nofo ei koe i ki Molimau a Ieova? E mata, e isi se saolotoga i mea tau lotu? Kafai e penā loa, ne aofia eiloa i ei a mea e uke ne fai ne otou taina mo tuagane i te feitu faka-te-agaga i te fia sefulu tausaga ko ‵teka, i olotou taumafaiga e uke i “te ‵puluga mo te fakamau‵tuga o te tala ‵lei mai lalo i te tulafono.” (Fili. 1:7) Faitalia me tefea te koga e nofo koe i ei, a te mafaufau ki te fakasologa o manumaloga o Molimau a Ieova i te tulafono e mafai eiloa o fakamalosi aka te ‵tou fakatuanaki. I te vaega tenei, ka iloilo aka ne tatou a nisi tala fakaofoofogia. E tuku mai ne ‵tou manumaloga a fakamaoniga fakafia‵fia me i te Malo se pulega tonu eiloa, me e se mafai ne tatou o fai a mea e uke i ‵tou malosi eiloa!