ỌKE wọ vwọ hẹ iruo rẹ aghwoghwo ri nẹ uwevwin kpo uwevwin, wọ da kpaẹro mrẹ imoto rẹ elọkpa. Ọke wọ vwọ ta ota kẹ ohwo, ọrivẹ wẹn de siomareyọ ọke rọ vwọ mrẹ nẹ imoto rẹ elọkpa domaji kẹrẹ ovwan. Ọlọkpa ọvo de ghwe wontọ nẹ imoto na, ọ da nọ: “Ovwan ihwo ivẹ na yen ihwo ri nẹ uwevwin kpo uwevwin re vuẹ ihwo kpahen Baibol na? Avwanre nyo eta buebun kpahen ovwan re!” Wọ da nabọ vwomakpotọ vwo dje oma phia kerẹ Oseri ri Jihova. Kẹ die yen cha phia?

Obo re phia vwẹ ekogho na yen cha nẹrhẹ a riẹn obo re cha phia. Vwẹ ikpe evo rhire na, mavọ yen usuon rẹ ẹkuotọ wọ dia ru Iseri ri Jihova re? Ugbomọphẹ rẹ ẹga hẹ evunrẹ ẹkuotọ na? Ọ da dia ọtiọyen, kọyen ọ ghwa họhọ oborẹ iniọvo rẹ avwanre ruru vwẹ ikpe buebun re wanre, ayen wianre gangan vwẹ “ochọ ẹchọ kugbe orugan rẹ iyẹnrẹ esiri na.” (Fil. 1:7) Otoro asan wọ dia-a, siẹrẹ wo de roro kpahen iyẹnrẹn rẹ ophikparobọ sansan rẹ Iseri ri Jihova rhiẹromrẹ vwẹ aguare re, ọ sa bọn esegbuyota wẹn gan. Vwẹ ẹbẹre nana, avwanre cha fuẹrẹn evo usun rẹ iyẹnrẹn tiọyena. Ophikparobọ rẹ avwanre ghwa odjephia nẹ Uvie na ghini suẹn re, kidie a cha mrẹ ophikparobọ nana womarẹ ẹgba rẹ avwanre komobọ-ọ!