SAMTANG nagbabalay-balay, nakabati ka hin tunog hin sirena. Nagtitikakusog ito. Magtitikang ka na unta pakiistorya ha tagbalay, kondi nakita han imo partner nga may humunong nga awto hin pulis. Humaw-as an sakay hito nga pulis, dinaop ha iyo, ngan nagpakiana: “Kamo ba an mga nagbabalay-balay ngan nakikiistorya mahitungod ha Biblia? May mga reklamo mahitungod ha iyo!” Matinalahuron nga binaton kamo ngan nagpakilala nga mga Saksi ni Jehova. Ano an sunod nga mahitatabo?

An baton hito kadak-an nadepende ha mga nahitabo ha naglabay. Ha naglabay nga katuigan, paonan-o gintatagad an mga Saksi ni Jehova han gobyerno han iyo nasud? May kagawasan ba kamo ha pagsingba? Kon may-ada, posible nga resulta ito han pangalimbasog han imo kabugtoan ha pagtoo han naglabay nga mga dekada ha “pagdepensa han maopay nga sumat ngan ha pagkaada legal nga katungod ha pagsangyaw hito.” (Fil. 1:7) Hain ka man naukoy, sigurado nga an pagpamalandong ha mga kadaogan han mga Saksi ni Jehova ha korte magpaparig-on han imo pagtoo. Hini nga seksyon, hihisgotan naton an pipira hiton makasaysayan nga kaso. An aton mga kadaogan pamatuod nga tinuod an Ginhadian, kay kon ha aton la pangalimbasog imposible kita magkaada sugad nga kadaogan!