AWANICISYE kuti akulalicila ku nyumba ni nyumba, ni ca pakutalicila akupikana kulila kwa galimoto ja polisi. Kaneko lisegwe lila likupikanika mnope. Pakutanda kuŵeceta kwa msyenenyumba, mjawo jwali najo asokonecele nganisyo ligongo lyakujiwona galimoto ja polisi jili mkwika pakuŵandicila. Kaneko jwapolisi akukopoka m’galimoto nikwawusya kuti, “Ana jemanja ni ŵamkulalicila ngani sya m’Baibulo m’majumbamu eti? Tuŵele mkupikana kuti jemanja mkwasokonasya ŵandu.” Jemanja akwanga mwaulemu kuti ali ŵa Mboni sya Yehofa. Ana pelepa ciyimale uli?

Ngani mpela syelesi siŵele sili mkutendekwa kutandila kalakala. Ana m’cilambo cakutamaco, boma jiŵele jili mkutenda yindu mwamtuli ni Mboni sya Yehofa? Ana m’cilambomo mwana ufulu wakulambila? Naga yili myoyo, nikuti mwangakayicila abale ni alongo ŵane ŵa yaka ya munyumamu, ŵalipelece mnope ‘pakucenjela soni kutamilikasya mwalilamusi ngani syambone.’ (Afil. 1:7, NW) Kulikose kwakutama, ganicisya ya yayatendecele ŵa Mboni sya Yehofa pangani ja kuwina magambo mpaka kulimbisye mnope cikulupi cetu. Mu mbali ajino, citulijiganye yindu yangaliŵalicika yayiŵele mkwatendecela ŵa Mboni sya Yehofa. Kuwina kwetuku kukusimicisya kuti Ucimwene wa Mlungu uli usyesyene. Tukuŵeceta m’yoyo ligongo lyakuti yeleyi nganiyiŵa yikombolece ni macili getu.