NJENGOBA nishumayela endlini ngendlu, nizwa inhlabamkhosi kude. Umsindo wayo uya usondela. Njengoba uqala ukukhuluma nomninikhaya, oshumayela naye uyaphazamiseka lapho kuma imoto yamaphoyisa. Elinye iphoyisa liyehla liqonde kini, libuze: “Nina nobabili, yinina laba enihamba indlu ngendlu nikhuluma ngeBhayibheli? Besilokhu sithola izikhalazo kubantu!” Niphendula ngenhlonipho, nichaze ukuthi ningoFakazi BakaJehova. Yini ezolandela?

Ngokwezinga elikhulu, ukuthi kuzolandelani kuxhomeke emlandweni. Eminyakeni edlule, uhulumeni wezwe lakini uye wasebenzelana kanjani noFakazi BakaJehova? Ikhona yini inkululeko engokwenkolo? Uma kunjalo, cishe lokho kuhlobene nendlela abafowenu nodadewenu abangokomoya abaye bazikhandla ngayo phakathi namashumi eminyaka ‘ekuvikeleni nasekumiseni ngokomthetho izindaba ezinhle.’ (Fil. 1:7) Nomaphi lapho uhlala khona, ukuzindla ngomlando wamacala aye anqotshwa oFakazi BakaJehova ezinkantolo kungaluqinisa kakhulu ukholo. Kule ngxenye, sizohlola omunye waleyo milando ephawulekayo. Ukunqoba kwethu kunikeza ubufakazi obuqand’ ikhanda bokuthi uMbuso ungokoqobo, ngoba besingeke sikwazi ukufinyelela izinto eziningi kangaka ngamandla ethu!