5 JALJA
Diosan Reinopan yatichäwinakapa: Reyin servirinakaparuw wakichtʼasi
TAMAMANKIR mä wayna jilatar jachʼa tantachäwin nayrïr kuti arstʼir istʼasajja, wal kusispachätajja. Jupan arstʼäwip istʼkasajja, kunjamsa Diosajj servirinakapar wakichtʼi ukwa amuytajja. Kunjamsa jupajj taman arstʼañ qalltäna ukwa amttajja, jichhajj suma wakichtʼatäjjatap uñjasajj wal kusistajja. Precursoranakatak Escuelar sarañajj qhanaw nayrar sartañapatak wal yanaptʼawayi. Qhepatsti, Diosan Reinopat Yatiyirinakataki Escuelaruw warmipamp sarawayaraki. Arstʼäwip tukuyarojja, wali suma arstʼatapatwa tantachasirinakajj tʼajjllirapjje, jumas ukhamaraki. Ukat mayni tantachasirinakar uñtasajja, kunjamsa Diosajj taqpach servirinakapar sum wakichtʼi ukwa amuyaraktajja.
Mä tiemponjja, Diosan servirinakapajj Jupamp yatichatäpjjaniwa sasaw mä profecian qhanañchasïna (Isa. 54:13). Uka tiemponwa jakasktanjja. Bibliat apstʼat qellqatanak toqe, tamasan utjki uka tantachäwinak toqe ukat jachʼa tantachäwinak toqew uka yatichäwinak katoqtanjja. Markapan utjki uka luräwinakamp phoqañatakejja, kunayman escuelanak toqew Diosajj wakichtʼarakistu. Aka jaljanjja, Diosat yatichäwinak katoqktan ukanakajj kunjamsa Reinopan apnaqjjatap uñachtʼayistu ukwa yatjjataskañäni.
AKA SECCIONANJJA AKA YATICHÄWINAKAW UTJI
16 YATICHÄWI
Diosar yupaychañatak tantachäwinaka
Tantachäwinakar sarasajja, ¿kunjamsa jukʼamp askinak apsna?
17 YATICHÄWI
Diosan Reinopat yatiyirinakaruw wakichtʼasi
Luräwinakap sum phoqapjjañapatakejja, ¿kunjamsa Diosan markapan utjki uka escuelanakajj jilat kullakanakar yanaptʼawayi?