NAKANGIRIT ka sa ispiker na nasa plataporma para mapakusog siya. Siya sarong hoben na brother na kakongregasyon mo, asin ini an primero niyang kabtang sa asembleya. Mantang maugma kang naghihinanyog sa pahayag niya, napapahanga ka nanggad sa itinataong pagsasanay sa mga lingkod nin Diyos. Nagigirumduman mo pa an paghihinguwa niya kan inot siyang magpahayag sa kongregasyon—asin ngunyan nag-uswag na nanggad siya! Dakula an nagin pag-uswag niya pagkatapos kan Paadalan sa Paglilingkod Bilang Payunir. Kasuarin pa sana, nag-adal sindang mag-agom sa School for Kingdom Evangelizers. Mantang nagpapalakpak ka sa magayunon na pahayag kan brother, nangalag-kalag ka asin naisip-isip mo an pagtutukdo na itinatao sa gabos na lingkod nin Diyos.

Ihinula kan Bibliya an panahon na an bilog na banwaan nin Diyos magigin mga ‘natukduan ni Jehova.’ (Isa. 54:13) Nabubuhay kita sa panahon na iyan. Tinatawan kita nin edukasyon bako sana paagi sa mga publikasyon ta kundi sa sato man na mga pagtiripon, asembleya, kumbensiyon, asin sa lain-lain na paadalan na dinisenyo tanganing andamon kita para sa partikular na mga asignasyon sa organisasyon ni Jehova. Sa seksiyon na ini, pag-aadalan ta kun paano an gabos na pag-edukar na ini nagtatao nin makusog na pruweba na namamahala na an Kahadian nin Diyos.