EPUNI a hnyimahnyima kowe la trejine ka cile fë cainöj. Ketre trejine thöth ne la ekalesia i epun, nge pane cainöje i angeice hi lai ngöne la hna asabele. Epuni pala kö a madrine la cainöje i angeic, nge epuni fe hë a haine la ini hna kapa hnene la itre hlue i Akötresie. Epuni a mekune lo aqane catre i angeic ngöne itre pane cainöje hnei angeice hna cile fë ekö, nge epuni a haine enehila la pengöi angeic. Hna ini angeic jëne la Ini Ne Cainöj Qaathei Akötresie, nge thupene lai, jëne la Ini Koi Itre Pionie. Ame eue hi lo, hnei angeic me föi angeic hna hane sine la Ini Koi Itre Ka Cainöj. Ame la kola xexe thupene la hna cainöj, epuni a goeëne xötreithi epun, me pane mekune la ini hna kapa hnene la itre hlue i Akötresie asë.

Hnei Tusi Hmitrötre hë hna perofetane la ketre ijine troa “inine . . . hnei Iehova” la itre hlue i Nyidrë. (Is. 54:13) Easë hi la a melëne la ijine cili. Easa kapa la ini jëne la itre itusi së, me jëne fe la itre icasikeu së, me itre asabele, me itre xa ini ju kö hna hnëkëne hnene la organizasio, matre troa atreine cilëne la itre hnëqa. Ame ngöne la xötre mekene celë, tro sa ce wange la enyipicine jëne la nöjei ini hna eköth ka hape, Baselaia i Akötresie a mus enehila.